Урғалыла саңғы ярыштары уҙҙы

Саңғы спортын яратыусыларға хатта пандемия ла ҡаршылыҡ була алманы. Ошо йылдарҙа саңғысылар Яңы Балаҡатайҙа, Түбәнге Үтәштә, Биләндә старт алды, быйыл иһә  саңғы ярыштары өсөнсө тапҡыр Урғалыла уҙҙы.

9 мартта ҡапыл һыуытып ебәрҙе, әммә саңғы спортын яратыусыларҙы Урғалы  тренеры,  Рәсәйҙең спорт мастеры  Данил Минниәхмәтов әҙерләгән саңғы юлы дәртләндерҙе. Өҫтәүенә быйыл саңғы юлы яҡтыртыла, ә был саңғы яратҡан һәр кеше уҡыуҙан, эштән һуң  киске ваҡытта саңғы юлынан үтә ала тигәнде аңлата. Был балалар, өлкәндәр һәм хатта пенсионерҙар өсөн дә һәйбәт стимул. Данил Наил улы  беҙҙе  физкультура – һауыҡтырыу комплексында урынлашҡан һәм  яңы технологиялар, ҡорамалдар менән йыһазландырылған  саңғы базаһына саҡырҙы. Данил Наил улының пландарында – саңғы трассаһына яҡын ғына саңғы базаһы төҙөү.

Ярыштарҙа ҡатнашыусылар  бер нисә төркөмгә бүленде. Барыһы ла ентекләп уйланылғайны һәм саңғысыларға уңайлы булырлыҡ итеп әҙерләнгәйне. Һәр кем бушлай бәлеш менән эҫе сәй эсә алды.

Ярыштарґа йәшенә һәм енесенә ҡарап бүленгән 9 төркөм ҡатнашты:  мәктәпкәсә йәштәге балалар, 1-4 кластар, 5-8 кластар  һәм 9-11 кластар  малайҙары һәм ҡыҙҙары, шулай уҡ  ете пенсионер.

Еңеүселәрҙе һәм призлы урын алыусыларҙы бүләкләү ҙә үҙенсәлекле булды. Рафаил Шәрифйән улы  ярышта ҡатнашыусыларҙы ике төрлө миҙал менән наградланы, уларҙың береһе шоколадтан ине. Өҫтәүенә һәр призёр ярыштарҙа ҡатнашҡан өсөн иҫтәлекле приз алды, наградлау тантанаһы үткәндән һуң Р.Ғәбитов  Мостай Кәримдең бер нисә шиғырын уҡып ишеттерҙе.

Валерий Шаһибәков,

спорт ветераны, Яңы Балаҡатай ауылы