Балаҡатайҙар тағы ла иң яҡшылар!

Улар спорттың  6 төрө буйынса үтте. Балаҡатай командаһы бар ярыштарҙа ла ҡатнашты һәм  бик уңышлы сығыш яһаны. Мәҫәлән, Урғалынан Ғәлиә Заһиҙуллина ике алтын миҙал яуланы. Ураҡтан Фәниә Ғәниева  шахмат һәм  16 килограмлыҡ гер күтәреүҙә  ике көмөш миҙал алды. Красный Пахарь ауылынан Сәғит Ғарипов  турникта күтәрелеүҙә  2-се, ә Николай Ширяев  24 килограмлыҡ гер күтәреүҙә 3-сө урын алды. Яңы Балаҡатайҙан Валерий Шаһибәков дартста еңеүсе булды. Үкенескә ҡаршы, спорттың көс төрҙәрендә  беҙҙең пенсионерҙарға  йәшерәк спортсылар менән ярышырға тура килде, шуға күрә был төрҙәрендә беҙ миҙалһыҙ ҡалдыҡ.

Волейбол ярыштары регламенты  беҙҙең спортсыларға почёт пьедесталына күтәрелеү мөмкинлеген бирмәне. Шуға күрә Яңы Балаҡатайҙан  Валерий Зверев менән Иҫке Балаҡатайҙан  Сергей Редреев шәхси наградаларһыҙ ҡалды, әммә дөйөм команда иҫәбенә тос өлөш индерҙе.  12 команда араһында Балаҡатай командаһы беренсе урын өсөн кубок яуланы.

Команда ағзалары  автобус водителе  Сергей Михайловҡа  оҫта йөрөткәне һәм спортсыларға яҡшы мөғәләмәһе өсөн рәхмәт әйтә.

Радик Нәсибуллин,

КПРФ-тың Балаҡатай  район бүлексәһе секретары