Күреү органдарын дауаларға ярҙам итә

Ул Айҙаҡай ауылында тыуып үҫкән. 1984 йылда “Шәфҡәт туташы эше” һөнәре буйынса Златоуст медицина училищеһын уңышлы тамамлағандан һуң йәш белгесте шунда уҡ Балаҡатай үҙәк район дауаханаһының терапия бүлексәһенә шәфҡәт туташы итеп эшкә алалар.  Һөнәри эшмәкәрлеген балалар бүлексәһе, процедура кабинетының, участка шәфҡәт туташы булып дауам итә. Бынан тыш, бына утыҙ биш йыл инде Чернобыль атом электр станцияһында авария эҙемтәләрен бөтөрөүселәр менән эшләй.

2017 йылдан алып  офтальмология кабинетында шәфҡәт туташы булып эшләй,  хеҙмәттәштәре  һәм пациенттар араһында үҙен  иғтибарлы, ярҙамға килергә һәр саҡ әҙер хеҙмәткәр итеп танытты. Уның хеҙмәт стажы  40 йылдан ашыу тәшкил итә.

Намыҫлы хеҙмәте өсөн төрлө кимәлдәге Маҡтау грамоталары һәм рәхмәт хаттары менән билдәләнгән.

Һаулыҡ һаҡлау системаһында оҙаҡ йылдар намыҫлы хеҙмәте, үҙ эшенә тоғролоғо, радиация йоғонтоһона дусар булған граждандарҙың сәләмәтлеген  һаҡлау һәм  медицина ярҙамы сифатын күтәреү өлкәһендә хеҙмәттәре  өсөн Зәфилә Әхмәт ҡыҙы Шәмсетдинова “Чернобыль”  инвалидтарҙың төбәк республика йәмәғәт ойошмаһы союзының Маҡтау грамотаһы менән наградланған, шулай уҡ  һуғыш ветерандарының клиника госпиталенең  республика консультация-координация үҙәгенең Рәхмәт хаты менән билдәләнгән.

Зәфилә Әхмәт ҡыҙы үҙ эшен яҡшы белгән  һәйбәт белгес кенә түгел, ә тормошто яратҡан,  эшһөйөүсән ҡатын,  хәстәрлекле әсәй һәм өс ейәненең яратҡан өләсәһе.

Лира Архипова,

автор фотоhы