Балаҡатай коммунистары – спортта иң яҡшылар

Турнир башланыр алдынан спортсылар митингыла һәм ауылдың үҙәк майҙанында В.И.Ленин һәйкәленә сәскәләр һалыуҙа ҡатнашты.

Ярыштарҙа КПРФ-тың дүрт райондағы бүлексәһе һәм республика комитеты ағзалары ҡатнашты.  8 кеше составында Балаҡатай район бүлексәһе командаһы  спорттың 6 төрө – атыу, дартс, өҫтәл теннисы, шахмат,  турникта күтәрелеү һәм баскетбол кәрзиненә туп ырғытыу  ярыштарында ҡатнашты.

КПРФ-тың урындағы бүлексәһе рәйесе Радик Нәсибуллин етәкселегендә  беҙҙең команда  бик уңышлы сығыш яһаны һәм дүрт алтын, бер көмөш һәм өс бронза миҙал яуланы. Мәҫәлән, Ҡарлыхандан Сергей Попов  шахмат турнирында бронза миҙал алды. Яңы Балаҡатайҙан Фларис Вәхитов  өҫтәл теннисында һәм туп ырғытыуҙа  еңеп, ике алтын миҙал менән наградланды. Красный Пахарҙан Сәғит Ғарипов бик күп ярыштарҙа уңышлы сығыш яһай. Бына хәҙер ҙә ул спорттың өс төрө буйынса ярыштарҙа ҡатнашып  барыһында ла миҙал яуланы. Мәҫәлән, дартста  көмөш һәм  туп ырғытыуҙа, турникта  күтәрелеүҙә  ике бронза миҙал. Тәжрибәле спортсының уңышы бик шәп! Яңы Балаҡатайҙан Николай Ширяев  атыуҙа һәм туп ырғытыуҙа  өсөнсө һөҙөмтә күрһәтте. Ошо юлдар авторы  атыуҙа һәм дартста еңде. Шулай уҡ Радик Нәсибуллин, Рифхан Нуретдинов менән Рәшит Нафиҡов  дөйөм команда еңеүенә тос өлөш индерҙе.

Дөйөм команда беренселегендє беҙҙең район командаһы  1-се урын алды һәм, кубок яулап,  ошо төбәк турниры чемпионы булды.

Валерий Шаһибәков,

спорт ветераны,

Яңы Балаҡатай ауылы