Ҙур күңелле бәләкәй йөрәк

Даяна китапхананың бөтә сараларында ла даими ҡатнаша, уның яҡтылыҡ һәм  эскерһеҙ  балалыҡ    менән тулы һүрәттәре стеналарҙы биҙәй һәм күҙҙе ҡыуандыра. Әммә күптән түгел Даяна иғтибарға ғына түгел, ә тәрән ихтирамға һәм һоҡланыуға лайыҡ эш эшләне.

Бала саҡ шатлыҡтары һәм ваҡ-төйәк нәмәләр өсөн тәғәйенләнгән кеҫә аҡсаһына Даяна аҙыҡ-түлек һатып алды. Уйынсыҡ та, тәм-том да түгел, ә башҡаларҙы йылыта алған нәмәләр. Был тыйнаҡ, әммә шундай ҡиммәтле йөк менән ул ауыл китапханаһына килде һәм “Зинһар, быны хәрби хәрәкәт зонаһындағы яугирҙарға  тапшырығыҙ”, – тип мөрәжәғәт итте.  Тыныс тауыш менән әйтелгән был һүҙҙәр ҙур көскә эйә. Даяна яҡындары өсөн борсолоуҙың, көтөү һәм өмөт нимә икәнен ишетеп кенә белмәй. Уның өлкән ағаһы Курскиҙа   хеҙмәт итә, һәм, бәлки, тап шул саҡта уның бала йөрәгендә өйҙән алыҫ булғандарға ярҙам итеүҙең ни тиклем мөһим булыуын аңлау барлыҡҡа килгәндер.

Даянаның ҡылығы хәйриәлек кенә түгел. Был тәрән  гражданлыҡ яуаплылығы һәм ярҙам итергә ихлас теләк сағылышы. Йәштән үк ул берҙәмлектең һәм үҙ-ара ярҙам итеүҙең мөһимлеген аңлай, бигерәк тә ауыр ваҡытта. Ул саҡырыуҙарҙы һәм акцияларҙы көтмәй, маҡтау эҙләмәй. Даяна бары тик үҙенең изге күңеле  күрһәткәнде генә эшләгән.

Даянаның  был ҡарары   китапханасы Марина Чебыкинаның күңеленә  үтеп инә,   уға  рәхмәт белдерҙе. “Беҙ уны мотлаҡ районға, яугирҙарыбыҙға даими рәүештә ярҙам йыйылған һәм ебәрелгән урынға, алып барып еткерәсәкбеҙ”, – тип яуапланы ул.   Һәм был һүҙҙәр генә түгел. Был вәғәҙә үтәләсәк,   Даяна һалған йылылыҡ өлөшсәһе мотлаҡ адресаттарға барып етәсәк.

Даяна Хөсәйенованың ҡылығы – хатта иң бәләкәй, саф йөрәк менән башҡарылған ғәмәлдәрҙең дә ҙур әһәмиәткә эйә булыуына сағыу миҫал. Ул беҙгә изгелектең йәше юҡлығын һәм һәр беребеҙҙең дөйөм эшкә үҙ өлөшөн индерергә һәләтле булыуын иҫкә төшөрә. Даяна – ул тыйнаҡ ҡыҙ ғына түгел, ул ысын бәләкәй герой, уның йөрәге ярҙамға мохтаж булғандарҙың йөрәктәре менән берләшә. Һәм уның был эше – ул барыбыҙҙы ла йылытҡан һәм рухландырған яҡтылыҡ нурҙары.

Үҙ хәбәрсебеҙ