Иң позитив кеше юбилейын билдәләй

Ул башҡалар тураһында һөйләргә ярата, әммә үҙенең биографияһын һәм шәхси тормошо тураһында бер ҡасан да һөйләмәй. Ул үҙенең ҙур юбилейын билдәләй. Уның тормош юлы 1940 йылдың 15 декабрендә Йәрмәкәй районында башлана, унда ул ҙур дуҫ ғаиләлә бишенсе бала булып донъяға килә. Мин уның ата-әсәһе тураһында хәтирәләре менән уртаҡлашыуын һораным, һәм ул ихлас  яуап бирҙе.

 “Атайым, Талбудтин (Талип) Иҙиәтулла улы Низаметдинов, 1900 йылда   Йәрмәкәй районында тыуған. Көслө һәм эшсән егет булып үҫә. Уның көсөн һәм намыҫлылығын бер бай кеше күрә, ул уны алыҫ Хакасияға, Абаҡан һәм Тайшет сиктәренә, себерҙең   төпкөлөнә алып китә. Ул кеше: “Һин миндә   эшләйһең, ә ун ете йәш тулғас, һиңә  ҡыҙымды  һәм бөтә байлығымды  бирәм... Әммә яҙмыш башҡаса хәл итә. Граждандар һуғышы башлана, һәм йәш Талипты армияға саҡыралар. Ул Колчакҡа ҡаршы һуғыша, уң ҡулы яралана һәм тыуған яҡтарына ҡайта, Бәләбәй госпиталендә яраларын дауалай. Өйгә ҡайтҡас, ул яңынан эшкә тотона. Бөйөк Ватан һуғышына уны алмайҙар иҫке яраһы ҡорал  торорға мөмкинлек бирмәй, уң ҡулының тарамыштары  зыян күрә.

Әсәйем Сания Сәхибгәрәй ҡыҙы 1907 йылда тыуған. Ғүмер буйы эшләй, ҙур хужалыҡ алып бара, атайым менән  йорт төҙөйҙәр. Әлбиттә, балалар тәрбиәләгән», – тип йылмайып иҫенә төшөрә Рәйфә Талип ҡыҙы. Уның һүҙҙәренсә, ата-әсәһе Сания һыу алырға барған шишмә янында таныша. Осрашалар, һөйләшәләр, һәм атаһы, оҙаҡ уйлап тормай, ҡыҙҙы үҙ йортона алып ҡайта. Тиҙҙән туй яһайҙар, һуңынан ете бала тәрбиәләйҙәр, уларға белем бирәләр. Ата-әсәйем,   ҡатмарлы һуғыш һәм һуғыштан һуңғы йылдарҙағы ауырлыҡтарға бирешмәй, улар лайыҡлы тормош алып барҙы. Атайым  70 йәшендә, әсәйем 90 йәшендә вафат булды.

Ә буласаҡ тормош иптәшем Дамир Даминдар  улы менән осрашыу нисек булды? Дамир эш буйынса төрлө урындарға, шул иҫәптән Йәрмәкәйгә лә килә ине, унда беҙ бер тапҡыр осраштыҡ. Һуңынан былай тип һөйләй:”Һине күреү менән ғашиҡ булдым, күрәһең, күптән инде шундай ҡыҙҙы эҙләгәнмендер”. Беҙ уның менән төрлө  характерлы  инек: ул бик хәрәкәтсән, етеҙ, ә мин тыныс, әкрен. Барыһы ла шулай башланды, осраҡлы осрашыуҙан һәм ғүмерлеккә...

Дамир Даминдар улы менєн Рәйфә Талип ҡыҙыныњ  өс балаһы бар: Айҙар, Гөлнара һәм Гүзәл,   алты ейәне һәм бер бүләһе бар. Бөтә балалар ҙа яҡшы белем алған. Улдары Айҙар Ҡыҙыл байраҡлы    Пермь Юғары хәрби команда-инженер   училищеһын тамамлай, Байконур космодромында эшләй, ә ике йыл хеҙмәт иткәндән һуң Мәскәү хәрби академияһына уҡырға инә. Академияны тамамлағас, кандидатлыҡ диссертацияһын яҡлай һәм техник фәндәр кандидаты ғилми дәрәжәһен ала. Бөйөк Петр исемендәге стратегик тәғәйенләнештәге ракета ғәскәрҙәре академияһында уҡытыусы булып хеҙмәт итә, подполковник дәрәжәһендә запасҡа сыға. Хәҙер яңыртылыусы энергия сығанаҡтары өлкәһендә эшләй. Ҡатыны Луиза менән ике бала тәрбиәләйҙәр, бер ейәнсәр һәм өс ейән олатаһы hєм µлєсєhе. 

Гөлнара бала саҡтан хореография менән мауыға. Мәсәғүт педагогия училищеһын һәм педагогия институтын тамамлай,   үҙенең тормошон бейеүһеҙ күҙ алдына ла килтерә алмай. Мәләүез ҡалаһында, һуңынан Санкт-Петербургта спорт-бал бейеүҙәре буйынса тренер һәм судья булып эшләй, ә хәҙер Сочиҙа йәшәй һәм эшләй, судья, спорт-бал бейеүҙәре буйынса Рәсәй бейеү спорты Федерацияһы тренеры, шулай уҡ «Карнавал бейеү театры» берекмәһе етәксеһе булып тора. Күптән түгел, әсәһен күрергә ҡайтҡас, Гөлнара Яңы Балаҡатай ауылының Мәҙәниәт Йортонда 60+ бал бейеү түңәрәген ойошторҙо.

Кесе ҡыҙы Гүзәл Мәсәғүт педагогия училищеһын, ә һуңынан Башҡорт дәүләт педагогия университетын тамамлай. Ул мәктәпкәсә белем биреү педагог-психологы. Ире Азамат менән Өфөлә йәшәйҙәр.  Дамир Даминдар улы күптән юҡ инде, әммә Рәйфә Талип ҡыҙы уның тураһында иң яҡты хәтирәләр һаҡлай…

Рәйфә Талип ҡыҙы хеҙмәт эшмәкәрлеген 10 класты тамамлағандан һуң икмәк бешереүсе булып башлай, сөнки ул ваҡытта уҡыу йортона инеү өсөн ике йыллыҡ эш стажы талап ителә. Һуңынан Дыуан районы Ярославка ауылы мәктәбендә пионервожатый булып эшләй. Бәләбәй педагогия училищеһын тамамлағандан һуң 1964 йылда ире менән Балаҡатай районына килә. Иҫке май заводы (хәҙер юҡҡа сыҡҡан) һәм Апут ауылдары мәктәптәрендә уҡытыусы, ә һуңынан утыҙ йыл Яңы Балаҡатай урта мәктәбендә өлкән пионервожатый булып эшләй. “Был иҫ киткес йылдар булды», – ти ул, - матур коллектив, яратҡан эш”.

Рєйфє Хафизова күп йылдар район гәзитенең штаттан тыш хәбәрсеһе булып тора. 2023 йылда уның В.Ощепков төҙөгән һәм мөхәррирләгән «Люблю писать о земляках» китабы сыҡты. Китапҡа төрлө йылдарҙа район гәзитендә баҫылған мәҡәләләр ингән, унда ул коллегалары, педагогтар, мәктәп пионер ойошмаһы эше, район халҡы тураһында яҙа, район ветерандар ойошмаһы һәм уның активистары тураһында очерктар һәм мәҡәләләр баҫтыра. Ул Яңы Балаҡатай ауыл советы депутаты, ауыл ҡатын-ҡыҙҙар советы ағзаһы, район судының халыҡ заседателе сифатында әүҙем йәмәғәт эше алып бара. Күп йыллыҡ әүҙем корреспондент эше өсөн Рәйфә Талип ҡыҙы Башҡорт АССР-ы Юғары Советы Президиумының Маҡтау грамотаһы, шулай уҡ КПСС, ВЛКСМ район комитетының, район халыҡ мәғарифы бүлегенең  Маҡтау  грамоталары менән наградланған. Район гәзите редакцияһынан һәм башҡа ойошмаларҙан дәртләндереүҙәр ала. 1990 йылда Мәскәүҙә бөтә союз рабселькорҙар конференцияһында ҡатнаша.

Бөгөн дә ул район Ветерандар Советының йәмәғәт тормошонда һәм эшмәкәрлегендә әүҙем ҡатнаша, киң мәғлүмәт саралары һәм йәмәғәтселек менән эшләү буйынса ветерандар советы комиссияһы ағзаһы булып тора. «Башҡортостан ветераны» республика гәзите һәм «Яңы Балаҡатай» район гәзите менән әүҙем хеҙмәттәшлек итә.

Район ветерандар Советы исеменән коллегабыҙҙы юбилейы менән ҡотлайбыҙ һәм шундай уҡ шат  һәм әүҙем булып ҡалыуын теләйбеҙ.

Саяф Абдрахманов,   район  ветерандар советының йәмәғәтселек hєм киң мәғлүмәт саралары  менән эш буйынса комиссия  рәйесе