Ҡартлығығыҙ бәхетле булһын

Ул Ҡурғаш ауылында күп балалы ғаиләлә донъяға килә. Атаһы менән әсәһе “Красный дугарь” колхозында төрлө эштәр башҡара. Һуғыштың тәүге көндәренән үк  атаһын фронтҡа алалар. Әсәһе дүрт балаһы менән бер үҙе ҡала. Иң өлкәне Миндезөлфәгә ни бары 9 йәш була. Әсәһе иртә таңдан ҡараңѓы төшкәнсе колхоз баҫыуҙарында эшләй. Ашап, йоҡлап туймаған ҡатын-ҡыҙҙар менән ҡарттар  12-шәр сәғәт  эшләргә көс таба, ҡайһы саҡта  ике-өс кеше  өсөн эшләйҙәр... Ә йорттағы бар эш – мәшәҡәттәр  бәләкәй ҡыҙҙың иңенә ята. Ул саҡта малайҙар менән ҡыҙҙарҙың  бурыстары йорт хужалығы менән генә сикләнмәй, уларға өлкәндәр менән бер рәттән баҫыу – фермаларҙа эшләргә,   ата-әсәһе ҡайтыуына өйҙө бер аҙ йылытыр өсөн бәләкәй арба менән урмандан  сатыр ташырға ла тура килә.  Өйҙәгеләрҙең оло ҡыуанысына  1947 йылда аталары фронттан ҡайта. Һуғыш йылдарында емерелгән хужалыҡты бик оҙаҡ аяҡҡа баҫтыралар. Эшсе ҡулдар етешмәй, әммә үҫмерҙәр элеккесә өлкәндәрҙең тәүге ярҙамсылары була. Бик күптәре белем алыу бәхетенән мәхрүм ҡала, бына Миндезөлфә Сабир ҡыҙы ла 4 класс ҡына тамамлай. Аҡрынлап тормош яйлана, атаһы колхозға умартасы булып эшкә урынлаша. Тырыш, нымыҫлы эшсән бер нисә баш умартанан колхозда тотош  умартасылыҡ булдыра.  Хаҡлы ялға сыҡҡанға тиклем ул умартасы булып эшләй.

1950 йылда Миндезөлфә  Айҙаҡай егете Харис Ҡәйүмовҡа кейәүгә сыға. Хеҙмәтен тултырып ҡайтҡан егет  ФЗО-ла уҡығандан һуң  Балаҡатай әҙерләүҙәр контораһына штаттағы һунарсы булып эшкә урынлаша. Уның инициативаһы менән районға америка шәшкеһе һәм канада ҡондоҙо алып ҡайталар. Ҡарлыхан заказнигы асылғас, уның беренсе егере була.  Ә йәш ҡатын үҙенең йорт хужалығында ла өлгөрә, Айҙаҡай медпунктында санитарка бурыстарын да намыҫлы башҡара. Ире менән бергәләп дүрт балаларын тәрбиәләп үҫтерәләр.

Хәҙер Миндезөлфә Сабир ҡыҙы бәләкәй улы  Әнис менән килене Раушания ғаиләһендә йәшәй.  Был ҡатынға тормошта күпте кисерергә тура килә, ләкин ул бар  хәсрәтте лайыҡлы үткәрә, түҙемле ҡатын,  аҡыллы һәм хәстәрлекле  әсәй булып ҡала. М.Ҡәйүмова –  хеҙмәт һәм тыл ветераны,  ул Бөйөк Ватан һуғышында Еңеү йыллыҡтары уңайынан юбилей миҙалдары менән наградланған. Ошо көндәрҙә лә  уға Бөйөк Еңеүҙең 80 йыллығы уңайынан юбилей миҙалы тапшырҙылар. Беҙ тыл эшсәненә  сәләмәтлек теләйбеҙ, ҡайғы-хәсрәт һеҙҙең йортоғоҙҙо урап үтһен. Ҡартлығығыҙ бәхетле булһын, Миндезөлфә Сабир ҡыҙы, һеҙ быға  лайыҡ!

Әлфиә Әйбәтуллина,

Айҙаҡай ауылы