Йөклө ҡатындар өсөн ниндәй хеҙмәт шарттары ҡаралған?

Беренсенән, эш биреүсе штатты ҡыҫҡартыу осрағында йөклө ҡатынды ҡыҫҡарта алмай. Законлы нигеҙ булмайынса буласаҡ әсәйҙе эштән сығарыу өсөн штраф, хатта енәйәти яуаплылыҡ ҡаралған.

Икенсенән, бәпес алырға йыйынған хеҙмәткәрҙе төнөн, ял көндәрендә йәки эш ваҡытынан һуң эшкә йәлеп итергә, командировкаларға ебәрергә ярамай. Бынан тыш улар тулы булмаған эш көнөнә лә хоҡуҡлы. Әммә шарттарҙы эш биреүсе менән алдан килешер кәрәк.

Өсөнсөнән, йөклө ҡатын-ҡыҙ зыянлы производствола көс түгә икән, уны икенсе эшкә күсереү зарур. Әммә эш хаҡы үҙгәрмәҫкә тейеш.

Дүртенсенән, буласаҡ әсәй өсөн эштә һынау ваҡыты ҡуйыу тыйыла.

“Эш биреүселәргә оҡшап бөтмәгән тағы ла бер мәл. Йөклө хеҙмәткәр эш ваҡытында врачҡа бара ала. Эш хаҡын һаҡлап, уны эштән ебәрергә тейештәр. Өҫтәүенә ул врачта ҡабул итеүҙә булыуын ниндәйҙер справка менән раҫларға тейеш түгел”, – тип аңлатма бирҙе БР Дәүләт хеҙмәт  инспекцияһы етәксеһе урынбаҫары  Оксана Ванскова.

“Былтыр  тулы көнгә эшкә сыҡҡанда 1,5 йәш тулғансы  бала тәрбиәләү буйынса  пособиены һаҡларға ярҙам иткән  үҙгәрештәр көсөнә инде. Шуға бәйле беҙгә ир-егеттәрҙән  шылтыратыуҙар күп килә. Ҡатыны  бала тәрбиәләү буйынса отпуск алһа, әммә пособиеһыҙ, улар беҙ “декрет” тултырып эшләүебеҙҙе дауам итә алабыҙмы тип ҡыҙыҡһына.  Эш биреүсе, әлбиттә, атайға ла, өләсәйгә лә, олатайға ла бала тәрбиәләү буйынса отпуск биреүҙән баш тарта алмай.  Закон буйынса ата- әсәнең икеһе лә бындай отпускты файҙалана ала. Шул уҡ ваҡытта айлыҡ пособие уларҙың береһенә генә түләнә”, – тип аңлатты Оксана Ванскова.

Бала тәрбиәләү буйынса отпускыны теләһә ниндәй ваҡытта өҙөп эшкә сығырға була, шул уҡ ваҡытта, кәрәк булғанда  уға тағы китергә мөмкин. Оксана Ванскова, ауыл ерендә эшләгән ҡатындарға  эш биреүсе  40 сәғәтлек эш  аҙнаһындағы кеүек эш хаҡын һаҡлап,  ҡыҫҡартылған 36  сәғәтлек эш аҙнаһы тәғәйенләргә тейеш, тип иҫкә төшөрҙө. Алыҫ Себер һәм  уларға тиңләштерелгән райондарҙа эшләгән  йөклө ҡатындарға ла шундай уҡ льготалар ҡарала.

“Башинформ” мәғлүмәттәренән