Милли проект ҙурыраҡ мөмкинлектәр бирә

“Туризм һәм ҡунаҡсыллыҡ индустрияһы” милли проекты ярҙамында Башҡортостан Республикаһы биләмәһендә глэмпингтар һәм кемпингтар һаны 3,6 тапҡырға артҡан. 2022-2024 йылдарҙа милли проект буйынса сараларҙы тормошҡа ашырыуға 1,8 миллиард һум йүнәлтелгән, шуның 1,7 миллиард һумы – федераль ҡаҙнанан, 130,1 миллион һумы – республика бюджетынан һәм 2,1 миллион һумы – урындағы бюджеттан.

– Дәүләт яғынан ярҙам туризм өлкәһендә инвестиция башланғыстарын тормошҡа ашырыу өсөн яңы мөмкинлектәр бирә, был, үҙ сиратында, бизнесты үҫтереү өсөн перспективалар аса һәм яңы эш урындары булдырыуға булышлыҡ итә, - тип билдәләне Башҡортостан Республикаһының эшҡыуарлыҡ һәм туризм министры Зөһрә Гордиенко.

Ошо осорҙа 28 пляжды төҙөкләндереү буйынса 177 проектҡа, 36 кемпинг һәм 52 модулле капиталь булмаған урынлаштырыу сараһын булдырыуға, һигеҙ электрон белешмә, алты яңы туристик маршрут әҙерләүгә; 41 туристик урын өсөн туристик ҡорамалдар һатып алыуға ярҙам күрһәтелде. Шулай уҡ Һаулыҡ мөмкинлектәре сикләнгән кешеләр тураһында хәстәрлек күреү йылында дәүләт ярҙамында уңайлы туристик мөхит булдырыуға алты проект бойомға ашырылған.

“Туризм һәм ҡунаҡсыллыҡ индустрияһы” милли проекты ярҙамында Өфө ҡалаһының туристик коды әҙерләнде. Ошо проектты тормошҡа ашырыуға 213,1 миллион һум бюджет аҡсаһы бүленгән. 97,2 гектар майҙанда туристик навигация, заманса архитектура яҡтыртҡыстары, күҙәтеү майҙансыҡтары ҡуйылған, яңы бәләкәй архитектура формалары, мобиль сәхнәләр һәм туристик-мәғлүмәт үҙәктәре, яҡтылыҡ инсталляциялары, махсус хеҙмәттәрҙе саҡырыу стойкалары, санитар зоналар һәм брендлы люктар ҡуйылған, шулай уҡ йәрминкә һәм ваҡиға зоналары йыһазландырылған.

Милли проект сиктәрендә Бөрө ҡалаһының туристик кодын үҫтереүгә конкурс нигеҙендә 20,2 миллион һум бүленгән. Был аҡсаға урам навигацияһы әҙерләнгән, туристик-мәғлүмәт үҙәге, мәғлүмәт стендтары һәм реклама-мәғлүмәт конструкциялары, арт-объекттар, яҡтылыҡ инсталляциялары ҡуйылған, ҡалала байрам йәрминкәләрен үткәреү урындары һәм майҙансыҡтары йыһазландырылған.

2022 йылда Башҡортостан Республикаһы мәктәп туризмы программаһын тормошҡа ашырыу буйынса пилот төбәктәрҙең береһенә әүерелде. Дөйөм белем биреү учреждениеларының 5-9-сы класс уҡыусылары өсөн төбәк буйлап бушлай туристик сәфәрҙәр ойошторолдо, был тыуған төйәктең тарихы һәм мәҙәниәте менән танышырға мөмкинлек бирҙе. 2022-2023 йылдарҙа мәктәп туризмы программаһында 50,4 мең бала ҡатнашҡан.

Милли проект сиктәрендә 2022-2024 йылдар осоронда биш ҙур сара ойошторолған һәм уҙғарылған, унда 50 меңдән ашыу кеше һәм турист ҡатнашҡан. Был сараларҙы тормошҡа ашырыуға 41 миллион һум аҡса бүленгән.

БЕЛЕШМӘ:

2025 йылдан яңы “Туризм һәм ҡунаҡсыллыҡ” милли проекты – “Туризм һәм ҡунаҡсыллыҡ индустрияһы” милли проектының дауамы тормошҡа ашырыла, уның сиктәрендә Башҡортостан Республикаһында “Номер фондын, инфраструктураны һәм яңы йәлеп итеү нөктәләрен булдырыу” төбәк проекты эшләй башланы. Аҡса туристик инфраструктураны үҫтереүгә, ваҡиғалы саралар үткәреүгә, муниципаль берәмек территорияһында ҡаланың туристик үҙәген төҙөкләндереүгә йүнәлтелгән йәмәғәт башланғыстарына дәүләт ярҙамы күрһәтеүгә бүленәсәк. “Туризм һәм ҡунаҡсыллыҡ” милли проекты 2030 йылға тиклем ғәмәлгә ашырыла.

Фото: Эшҡыуарлыҡ һәм туризм министрлығы.