Изге ай башлана

Был изге айҙа мосолмандар ураҙа тота. Ураҙа (ғәрәпсә “сыям”) – Аллаһ ризалығы өсөн, иртәнге таңдан алып кис ҡояш байығанға ҡәҙәр, ашау-эсеү һәм енси яҡынлыҡ ҡылыуҙан тыйылыу. Рамаҙан айында ураҙа тотоуҙың мәғәнәһе – беренсенән, Ҡөрьән Мөхәммәд (саллал-лаһу ғәләйһи үә сәлләм) өммәтенә хаҡты эҙләү һәм дөрөҫтө ялғандан айырыу өсөн ебәрелгән, икенсенән, был айҙа изге Ҡәҙер кисе бар (Әл-Ҡәҙер сүрәһе), өсөнсөнән, Аллаһы Тәғәлә Үҙе был айҙың дәрәжәһен күтәргән һәм был айҙа ҡылынған изгелектәрҙең сауабын күпкә арттыра, дүртенсенән, был айҙа һәр кешенең алдағы йылға тәҡдире төшөрөлә.

Осраҡтан файҙаланып, барығыҙға ла иман ныҡлығы теләйем, сөнки Рамаҙан айы  юғары изге йолаларҙы тергеҙеүҙең бер өлөшө, рухи яңырыуға, берҙәмлекте нығытыуға, йәмғиәттә насар күренештәргә түҙеп тормаусанлыҡ  формалаштырыуға булышлыҡ итә.

А.Әхмәтйәнов, Балаҡатай районының  имам - мөхтәсибе