Районда техниканың һәм хеҙмәттәрҙең яҙғы ташҡынға әҙерлеген тикшерҙеләр

Яңы Балаҡатай ауылы үҙәгендә яҙғы ташҡын осоронда килеп тыуыуы ихтимал булған ғәҙәттән тыш хәлдәрҙе иҫкәртеү һәм бөтөрөүгә йәлеп ителгән көстәр һәм сараларға смотр уҙҙы. Ташҡын ваҡытында халыҡтың һәм территорияларҙың хәүефһеҙлеге өсөн яуап биргән хеҙмәттәрҙең әҙерлек кимәлен район Хакимиәте башлығы М.Миниғәлин, иҡтисад, төҙөлөш һәм йәшәйеште тәьмин итеү идаралығы начальнигы Ғ.Яҡупов, Берҙәм дежур диспетчер хеҙмәте начальнигы А.Никитин һәм Хакимиәттең граждандар оборонаһы һәм ғәҙәттән тыш хәлдәр буйынса баш белгесе Л.Мирзакамалова баһаланы. Комиссия ҡуйылған машиналарҙы ҡарап сыҡты, заманса махсус техниканың мөмкинлектәре менән танышты, уны эштә ҡулланған кешеләр менән аралашты.

-Был сара йолаға әүерелгән, бындай тикшереүҙәрҙе беҙ һәр яҙ мартта уҙғарабыҙ, - тине М.Миниғәлин. – Ғәмәлдә бында миҙгелле хәүефкә ғәҙәттән тыш хәлдәрҙе иҫкәртеү һәм бөтөрөү буйынса район биләмәһендәге системаның бар көстәре һәм сараларының әҙерлеге тикшерелә. Беҙҙә алда торған миҙгел хәүефтәре – ташҡын һәм янғын хәүефе юғары булған йәйге осор. Ярашлы рәүештә,бында янғын техникаһы ла , ғәҙәттән тыш хәлдәрҙә кешеләрҙе ҡотҡарыу саралары ла күрһәтелгән. Смотр һөҙөмтәләре буйынса , территория системаһы яҙ килеүенә әҙер, тип әйтергә мөмкин.

Бынан алда ғәҙәттән тыш хәлдәрҙе иҫкәртеү һәм бөтөрөү һәм янғын хәүефһеҙлеген тәьмин итеү буйынса комиссияның ултырышы уҙғайны, унда биләмәләрҙе “ҙур һыу” үтеүгә әҙерләү мәсьәләләре ҡаралды.

Яҙғы ташҡын ниндәй булыр - әлегә ниндәйҙер күҙаллауҙар эшләргә иртәрәк. Ғәҙәттән тыш хәлдәр хеҙмәте мәғлүмәттәренә ҡарағанда, ваҡиғалар насар үҫешкәндә республиканың 42 районында 80 меңдән ашыу кеше йәшәгән 257 самаһы тораҡ пункттың һыу баҫыу зонаһында ҡалыуы ихтимал. Республикала 16 меңдән ашыу кеше һәм 4 мең самһы техника һәм йөҙөү сараһы составындағы төркөм ташҡын эҙемтәләрен бөтөрөргә әҙер.

Автор: Елена Усольцева

Читайте нас