«Өфө» футбол клубы Сергей Семак етәкселегендә икенсе тапҡыр еңеү яуланы

«Өфө» футбол клубы үҙенең яңы тренеры Сергей Семак етәкселегендә Рәсәй футбол Премьер-лигаһы чемпионатының тәүге яҙғы матчында еңеү яуланы.

Бер нисә көн элек уҙған кубок уйынындағы кеүек Грозный ҡалаһындағы осрашыу өфөләр файҙаһына 1:0 иҫәбе менән тамамланды. Силвестр Игбундың (Слай) 80-се минуттағы голы «Терек»ты оторға ярҙам итте. Осрашыу барышында «Өфө»нөң яңы уйынсыһы, ҡапҡасы Александр Беленов пенальтиҙы кире ҡаға алды.

«Өфө» 28 мәрәй йыйҙы һәм «Терек»ты ҡыуып етте – был пар тағы ла бер көньяҡ команда – Европа кубогында ҡатнашыусы «Ростов» менән 5-7 урындарҙы бүлешә.

«Өфө» киләһе уйынды 11 мартта үҙенең майҙанында Һамарҙың «Совет ҡанаттары»на ҡаршы үткәрә.